മാഹി: ഭിന്നശേഷിക്കാരായ യുവതീയുവാക്കളുടെ വിദ്യാഭ്യാസം, തൊഴിൽപരിശീലനം, പുനരധിവാസം, സാമൂഹിക ഉൾക്കൊള്ളൽ, സ്വയംപര്യാപ്ത ജീവിതം എന്നിവയ്ക്കായി പ്രവർത്തിക്കുന്ന സ്ഥാപനങ്ങൾക്ക് പുതുച്ചേരി സർക്കാർ തുടർന്നും എല്ലാ വിധ പിന്തുണയും നൽകുമെന്ന് പുതുച്ചേരി സംസ്ഥാന വഖഫ് ബോർഡ് ചെയർമാൻ അഡ്വ. വി.പി. അബ്ദു റഹ്മാൻ വ്യക്തമാക്കി.
ന്യൂമാഹി മലയാള കലാഗ്രാമത്തിൽ തണൽ വൊക്കേഷണൽ റീഹാബിലിറ്റേഷൻ സെന്ററിന്റെയും അബുദാബി മാഹി വെൽഫെയർ അസോസിയേഷന്റെയും ആഭിമുഖ്യത്തിൽ ദ്വിവത്സര തൊഴിൽപരിശീലനം പൂർത്തിയാക്കിയ ഭിന്നശേഷി വിദ്യാർത്ഥികളുടെ ഗ്രാജുവേഷൻ ചടങ്ങിൽ മുഖ്യാതിഥിയായി സംസാരിക്കുകയായിരുന്നു അദ്ദേഹം.
വിദ്യാർത്ഥികൾക്ക് ലഭിക്കുന്ന സർട്ടിഫിക്കറ്റുകൾ പഠനത്തിന്റെ സമാപനമല്ലെന്നും, ആത്മവിശ്വാസത്തോടെയും സ്വയംപര്യാപ്തതയോടെയും പുതിയ ജീവിതത്തിലേക്കുള്ള തുടക്കമാണെന്നും അദ്ദേഹം ഓർമ്മിപ്പിച്ചു. വിദ്യാർത്ഥികൾ സ്വന്തം കഴിവുകളിൽ വിശ്വാസമർപ്പിച്ച് മുന്നേറണമെന്നും അവരുടെ വിജയങ്ങൾ സമൂഹത്തിന് പ്രചോദനമാകട്ടെയെന്നും അദ്ദേഹം ആശംസിച്ചു.
