ഇനിയും തുറക്കാത്ത മുഴപ്പിലങ്ങാട് -മാഹി ബൈപാസ് പാതയില്‍ കൗമാരക്കാരുടെ ബൈക്ക് -കാര്‍ ഡ്രൈവിങ് അഭ്യാസം.വാഹനമോടിക്കാന്‍ ലൈസന്‍സ് കിട്ടിയതിന്റെ ആവേശത്തിലും ആഹ്ലാദത്തിലും കഴിഞ്ഞ കുറേ മാസങ്ങളായി രാവിലെയും വൈകീട്ടും ഇരുചക്രവാഹനങ്ങളുമായി നിരവധിയാളുകള്‍ ബൈപാസിലെത്തുന്നുണ്ട്.
വേനലവധിയായതിനാല്‍ കൂട്ടുകാരുമൊത്താണ് ബൈക്കിലുള്ള അപകടകരമായ അഭ്യാസങ്ങള്‍ നടത്തുന്നത്. പ്രഭാതസവാരിക്ക് ഇറങ്ങുന്നവരടക്കം ഭീതിയോടെ കടന്നുപോവേണ്ട സ്ഥിതിയാണ്. രണ്ടോ മൂന്നോ ഇരു ചക്രവാഹനങ്ങള്‍ മത്സരിച്ച്‌ സാഹസികമായി വാഹനമോടിക്കുന്നത് കാഴ്ചക്കാരെ ഭയപ്പാടിലാക്കുന്നുണ്ട്.
താഴെ ചൊക്ലി -മാഹിപ്പാലം റോഡില്‍ കണ്ണൂര്‍ ഭാഗത്തേക്ക് നിയന്ത്രണമുണ്ട്. അതിരാവിലെയായതിനാല്‍ പൊലീസ് പരിശോധനയുണ്ടാകില്ലെന്ന ധാരണയും അഭ്യാസങ്ങള്‍ക്ക് കാരണമാകുന്നുണ്ട്. മാഹി – ചോമ്പാല – പള്ളൂര്‍ പൊലീസ് ഉദ്യോഗസ്ഥര്‍ ഇടവിട്ട ദിവസങ്ങളില്‍ മിന്നല്‍ പരിശോധന നടത്തിയാല്‍ അമിത വേഗത്തിന് തടയിടാനാവും.
അപകടമില്ലാതാക്കാനും കഴിയുമെന്ന് നാട്ടുകാര്‍ പറഞ്ഞു. രക്ഷിതാക്കള്‍ ജാഗ്രത പുലര്‍ത്തണം. യാത്ര നിരോധിച്ചിട്ടുള്ള പാതയില്‍ ബൈക്ക് റൈസിങ് നടത്തുന്നത് തടയാന്‍ അധികൃതര്‍ തയാറാകണമെന്നും പ്രദേശവാസികള്‍ ആവശ്യപ്പെട്ടു. സര്‍വിസ് ആരംഭിക്കാത്ത ബൈപാസില്‍ അപകടമുണ്ടായാല്‍ ഇന്‍ഷുറന്‍സ് ക്ലെയിം ചെയ്യാനാവില്ല.
കഴിഞ്ഞദിവസം രാത്രി 10.30 ഓടെ അമിതവേഗതയില്‍ എതിര്‍ദിശയില്‍ നിന്നെത്തിയ ബൈക്കിടിച്ച്‌ ചൊക്ലി ഭാഗത്തേക്ക് പോവുകയായിരുന്ന കാറിന്റെ ഡീസല്‍ ടാങ്ക് ഉള്‍പ്പെടെ തകര്‍ന്നിരുന്നു.