മാഹി: നിത്യോപയോഗ സാധനങ്ങളുടെ വിലക്കയറ്റം മൂലം പെട്രോൾ പമ്പ് തൊഴിലാളികളുടെ ജീവിതം പ്രതിസന്ധിയിലായ സാഹചര്യത്തിൽ, അടിയന്തരമായി വേതനം വർദ്ധിപ്പിക്കണമെന്ന് ആവശ്യപ്പെട്ട് ഒക്ടോബർ 23-ന് മാഹി അഡ്മിനിസ്ട്രേറ്റർ (ആർ. എ.) ഓഫീസിലേക്ക് സംയുക്ത തൊഴിലാളി യൂണിയൻ മാർച്ചും ധർണ്ണയും നടത്തും.
വേതന വർദ്ധനവ് ആവശ്യപ്പെട്ട് ആറ് മാസം മുൻപ് മാഹിയിലെ ഭരണാധികാരികൾക്കും പെട്രോൾ പമ്പ് മാനേജ്‌മെന്റുകൾക്കും നിവേദനങ്ങൾ നൽകിയിരുന്നു. എന്നാൽ പ്രശ്നത്തിന് പരിഹാരം കാണാൻ അധികൃതരുടെ ഭാഗത്തുനിന്ന് യാതൊരു നടപടിയും ഉണ്ടാകാത്ത സാഹചര്യത്തിലാണ് തൊഴിലാളികൾ സമരത്തിലേക്ക് നീങ്ങുന്നത്.
ഒക്ടോബർ 22-ന് അർദ്ധരാത്രി മുതൽ 24 മണിക്കൂർ സൂചന പണിമുടക്ക് നടത്തുന്ന തൊഴിലാളികൾ, 23-ാം തീയതി രാവിലെ 11 മണിക്കാണ് അഡ്മിനിസ്ട്രേറ്റർ ഓഫീസിലേക്ക് മാർച്ചും ധർണ്ണയും നടത്തുക. സമരം നടത്തിയിട്ടും പ്രശ്നം പരിഹരിക്കാൻ തയ്യാറായില്ലെങ്കിൽ നവംബർ 1 മുതൽ അനിശ്ചിതകാല പണിമുടക്ക് ആരംഭിക്കാനും സംയുക്ത തൊഴിലാളി യൂണിയൻ ഭാരവാഹികളുടെ യോഗം തീരുമാനിച്ചു.
യോഗത്തിൽ ഐ.എൻ.ടി.യു.സി. (INTUC) നേതാവ് കെ. മോഹനൻ അധ്യക്ഷത വഹിച്ചു. ടി. സുരേന്ദ്രൻ (CITU), സത്യൻ ചാലക്കര, കെ. ടി. സത്യൻ (BMS) എന്നിവർ സംസാരിച്ചു.