മാഹി: നഗരമധ്യത്തിലെ കെട്ടിടങ്ങളിൽ നിന്നുള്ള വാട്ടർടാങ്ക് ഓവർഫ്ലോ വെള്ളം പൊതുവഴിയിലേക്ക് ഒഴുക്കിവിടുന്നത് കാൽനടയാത്രക്കാർക്കും വ്യാപാരികൾക്കും വലിയ ബുദ്ധിമുട്ടാകുന്നു. മാഹി പള്ളിക്കടുത്ത് സി.സി. ബാറിന് മുൻവശത്തെ കെട്ടിടത്തിലാണ് ടാങ്ക് നിറഞ്ഞ് വെള്ളം ഫുട്പാത്തിലേക്കും റോഡിലേക്കും പതിക്കുന്നത്
യാത്രക്കാർക്ക് ദുരിതം: കെട്ടിടത്തിന് മുകളിൽ നിന്നും വെള്ളം താഴേക്ക് പതിക്കുന്നത് ഫുട്പാത്തിലൂടെ പോകുന്നവരുടെ ദേഹത്ത് വീഴുന്നത് പതിവായിരിക്കുകയാണ്.
റോഡ് നനയുന്നു: ടാങ്ക് നിറയുമ്പോൾ ഒഴുകിയെത്തുന്ന വെള്ളം സമീപത്തെ ഓട്ടോ സ്റ്റാൻഡ് വരെ പരന്നൊഴുകുന്ന അവസ്ഥയാണ്.
അധികൃതരുടെ അനാസ്ഥ:മാഹി മുൻസിപ്പാലിറ്റി, പി.ഡബ്ല്യു.ഡി ഓഫീസുകൾക്ക് തൊട്ടടുത്തായിട്ടും ഈ വിഷയത്തിൽ നടപടിയെടുക്കാൻ ഉദ്യോഗസ്ഥർ തയ്യാറാകുന്നില്ലെന്ന് നാട്ടുകാർ പരാതിപ്പെടുന്നു.
നാട്ടുകാരുടെ പ്രതിഷേധം
വൻകിട കെട്ടിട ഉടമകൾക്കെതിരെ നടപടിയെടുക്കാൻ അധികൃതർ ഭയപ്പെടുകയാണോ എന്ന ചോദ്യമാണ് പ്രദേശവാസികൾ ഉയർത്തുന്നത്. പൊതുവഴിയിലെ ഈ ശല്യത്തിന് അറുതി വരുത്താൻ നഗരസഭാ അധികൃതർ അടിയന്തരമായി ഇടപെടണമെന്ന് നാട്ടുകാരും ഓട്ടോ തൊഴിലാളികളും ആവശ്യപ്പെട്ടു.
