മാഹി: കഴിഞ്ഞ ഏഴ് വർഷമായി മയ്യഴിയിലും പരിസരപ്രദേശങ്ങളിലും കാരുണ്യ പ്രവർത്തനങ്ങളിൽ സജീവമായ ഹ്യൂമൻ ചാരിറ്റി ആൻഡ് കൾച്ചറൽ സെന്റർ പുതിയൊരു നാഴികക്കല്ല് കൂടി പിന്നിടുന്നു. ചികിത്സാ ചെലവ് കണ്ടെത്താൻ ബുദ്ധിമുട്ടുന്ന രോഗികൾക്കായി അത്യാധുനിക മെഡിക്കൽ ഉപകരണങ്ങൾ സൗജന്യമായി ലഭ്യമാക്കുന്ന 'മെഡിക്കൽ എക്യുപ്മെന്റ് ബാങ്ക്' പ്രവർത്തനമാരംഭിച്ചു.
പദ്ധതിയുടെ പ്രത്യേകതകൾ:
* സൗജന്യ സേവനം: ബൈപ്പാപ്പ് മെഷീൻ, ഓക്സിജൻ കോൺസെൻട്രേറ്റർ, വാട്ടർ ബെഡ്, എയർ ബെഡ്, വാക്കറുകൾ, വീൽചെയറുകൾ തുടങ്ങിയ വിലപിടിപ്പുള്ള ഉപകരണങ്ങൾ രോഗികൾക്ക് തികച്ചും സൗജന്യമായി ഉപയോഗിക്കാം.
* തിരിച്ചേൽപ്പിക്കൽ: ആവശ്യം കഴിഞ്ഞാൽ ഉപകരണങ്ങൾ തിരികെ നൽകാവുന്ന രീതിയിലാണ് ബാങ്കിന്റെ പ്രവർത്തനം.
ഞായറാഴ്ച വൈകിട്ട് നാലുമണിക്ക് മാഹി കുന്നുമ്മൽ റോഡിലുള്ള എക്യുപ്മെന്റ് ബാങ്ക് ഹ്യൂമൻ എക്സിക്യൂട്ടീവ് കമ്മിറ്റി അംഗങ്ങളായ അഹമ്മദ് പി.കെ, ഡോക്ടർ രാജേഷ് ജി.ആർ എന്നിവർ ചേർന്ന് ഉദ്ഘാടനം ചെയ്തു. ഗിരീഷ് ഡി.എസ് സ്വാഗതം പറഞ്ഞു. ബ്ലഡ് ഡോണേഴ്സ് കേരള (BDK) ഭാരവാഹികളായ പി.പി റിയാസ്, സമീർ പെരിങ്ങാടി എന്നിവർ മുഖ്യാതിഥികളായി പങ്കെടുത്തു. എക്സിക്യൂട്ടീവ് കമ്മിറ്റി അംഗങ്ങളും ചടങ്ങിൽ സംബന്ധിച്ചു.
