മാഹി: നഗര ശുചീകരണത്തിൽ പുതിയ കരാറുകാരൻ വരുത്തിയ മാറ്റങ്ങളെ തുടർന്ന് മാഹി മൂലക്കടവ് പന്തക്കൽ ഭാഗത്ത് മാലിന്യം കുമിഞ്ഞുകൂടുന്നു. ദിവസവും നടത്തിയിരുന്ന ശുചീകരണം ആഴ്ചയിൽ മൂന്ന് ദിവസം മാത്രമായി പുതിയ കരാറുകാരൻ ചുരുക്കിയതാണ് പ്രദേശവാസികൾക്കും കച്ചവട സ്ഥാപനങ്ങൾക്കും വലിയ ദുരിതമായി മാറിയത്.
മുൻപ് കൃത്യമായി ദിവസവും നഗര ശുചീകരണം നടത്തിയിരുന്ന പ്രദേശമാണിത്. എന്നാൽ, കരാറുകാരന്റെ അനാസ്ഥ കാരണം മാലിന്യം യഥാസമയം നീക്കം ചെയ്യാതെ അടിഞ്ഞുകൂടുന്നത് പ്രദേശവാസികളുടെ ആരോഗ്യത്തിനും കച്ചവട സ്ഥാപനങ്ങളുടെ പ്രവർത്തനത്തിനും ഒരുപോലെ ഭീഷണിയായിരിക്കുകയാണ്.
പ്രധാനമന്ത്രിയുടെ 'സ്വച്ഛ് ഭാരത്' പദ്ധതിയിലൂടെ രാജ്യം മാലിന്യമുക്ത ഭാരതം ലക്ഷ്യമിടുമ്പോൾ, മാഹിയിലെ ഒരു പ്രധാന നഗരപ്രദേശത്ത് കരാറുകാരന്റെ ഉത്തരവാദിത്തമില്ലായ്മ കാരണം ജനങ്ങൾ ബുദ്ധിമുട്ടുന്നത് അധികാരികളുടെ ശ്രദ്ധയിൽപ്പെടുത്തേണ്ട വിഷയമാണ്.
മാലിന്യ പ്രശ്‌നത്തിന് ഉടൻ പരിഹാരം കാണണമെന്നാവശ്യപ്പെട്ട് അധികാരികളുടെ കണ്ണ് തുറപ്പിക്കാനായി പ്രദേശവാസികളും കച്ചവടക്കാരും ചേർന്ന് ശക്തമായ സമരപരിപാടികൾ ആസൂത്രണം ചെയ്തുവരികയാണ്.
