ന്യൂ മാഹി ഗ്രാമപഞ്ചായത്തിലെ ഏക ഹയർസെക്കൻ്ററി വിദ്യാലയമായ എം എം ഹയർസെക്കൻ്ററി സ്കൂളിന് സമീപം കല്ലായി ചുങ്കത്ത് ബസ് വെയിറ്റിംഗ് ഷെൽട്ടർ നിർമ്മിക്കണമെന്നാവശ്യപ്പെട്ട് മാഹി എംഎൽഎ അഡ്വ. ടി. അശോക് കുമാറിന് നിവേദനം നൽകി. ന്യൂ മാഹി ഗ്രാമപഞ്ചായത്ത് പ്രസിഡൻ്റ് അർജുൻ പവിത്രൻ മാഹി എംഎൽഎയുടെ ഓഫീസിൽ നേരിട്ടെത്തിയാണ് നിവേദനം കൈമാറിയത്. സി കെ പ്രകാശൻ, വി കെ മുഹമ്മദ് തമീം എന്നിവരും അദ്ദേഹത്തോടൊപ്പം ഉണ്ടായിരുന്നു.
സ്കൂളിലെ വിദ്യാർഥികൾക്കും പൊതുജനങ്ങൾക്കും സുരക്ഷിതമായ ബസ് കാത്തിരിപ്പ് സൗകര്യം ഒരുക്കുന്നതിനായി കല്ലായി ചുങ്കത്ത് ബസ് വെയിറ്റിംഗ് ഷെൽട്ടർ അനിവാര്യമാണെന്ന് നിവേദനത്തിൽ ചൂണ്ടിക്കാട്ടുന്നു. മാഹി പൊതുമരാമത്ത് വകുപ്പിന്റെ ഉടമസ്ഥതയിലുള്ള റോഡിന്റെ കിഴക്ക് ഭാഗത്ത് ഷെൽട്ടർ നിർമ്മിക്കുന്നതാണ് അനുയോജ്യമെന്ന് വിലയിരുത്തിയിട്ടുണ്ട്. പ്രസ്തുത സ്ഥലം പോണ്ടിച്ചേരി സംസ്ഥാനത്തിന്റെ ഭാഗമായതിനാൽ, ബന്ധപ്പെട്ട വകുപ്പുകളിൽ നിന്നും അധികാരികളിൽ നിന്നും ആവശ്യമായ അനുമതികൾ ലഭ്യമാക്കുന്നതിനും നിർമ്മാണത്തിനുമായി എംഎൽഎ എന്ന നിലയിൽ ആവശ്യമായ ഇടപെടൽ നടത്തണമെന്ന് നിവേദനത്തിൽ അഭ്യർത്ഥിച്ചു.
