ന്യൂ മാഹി: സുസ്ഥിര പ്രവർത്തനങ്ങളിലൂടെ മാതൃകയാകുന്ന ന്യൂ മാഹി ഗ്രാമപഞ്ചായത്ത് കുടുംബശ്രീ സിഡിഎസ്, തങ്ങളുടെ തനത് ഫണ്ടിൽ നിന്ന് മുഴുവൻ സിഡിഎസ് അംഗങ്ങൾക്കും ഓണം അലവൻസ് നൽകി പുതിയ തുടക്കമിട്ടു. പദ്ധതിയുടെ വിതരണ ഉദ്ഘാടനം ന്യൂ മാഹി ഗ്രാമപഞ്ചായത്ത് പ്രസിഡന്റ് അർജുൻ പവിത്രൻ നിർവഹിച്ചു.
കുടുംബശ്രീ സംവിധാനത്തിനായി നിരന്തരം പ്രയത്നിക്കുന്ന അംഗങ്ങൾക്ക് ഉത്സവകാലങ്ങളിൽ സാമ്പത്തിക സഹായം നൽകാൻ സാധിക്കാതിരുന്നത് മുൻകാലങ്ങളിലെ വലിയൊരു പോരായ്മയായിരുന്നുവെന്ന് അദ്ദേഹം പറഞ്ഞു. തനതുഫണ്ട് വർധിപ്പിക്കാനായി നടപ്പിലാക്കിയ കൃത്യമായ ആസൂത്രണത്തിലൂടെയാണ് ഈ വർഷത്തെ ഓണം അലവൻസ് നൽകാൻ സാധിച്ചതെന്നും, ഇത് സിഡിഎസിന്റെ കൂട്ടായ്മയുടെ വിജയമാണെന്നും ഗ്രാമപഞ്ചായത്ത് പ്രസിഡന്റ് കൂട്ടിച്ചേർത്തു.
