മാഹി: തലശ്ശേരി-പാനൂർ റോഡിലെ കോപ്പാലം ഭാഗത്ത് കനത്ത മഴയെത്തുടർന്ന് റോഡ് വീണ്ടും തകർന്ന് വൻ കുഴികൾ രൂപപ്പെട്ടു. മഴക്കാലത്ത് ഈ ഭാഗത്ത് റോഡ് പൊട്ടിപ്പൊളിയുന്നത് നിത്യസംഭവമായി മാറിയിരിക്കുകയാണ്. കുഴികളിൽ വെള്ളം കെട്ടിക്കിടക്കുന്നതിനാൽ നിരവധി ഇരുചക്രവാഹനങ്ങളാണ് ഇവിടെ അപകടത്തിൽപ്പെടുന്നത്.
കുഴികളിൽ വാഹനങ്ങൾ ചാടുമ്പോൾ ചെളിവെള്ളം റോഡരികിലെ കടകളിലേക്കും കാൽനടയാത്രക്കാരുടെ ശരീരത്തിലേക്കും തെറിക്കുന്നത് വ്യാപാരികൾക്കും വലിയ ബുദ്ധിമുട്ട് സൃഷ്ടിക്കുന്നുണ്ട്.
ഗതാഗതത്തിരക്കുള്ള പ്രധാന പാത
ദിവസവും അറുപതിലധികം ബസുകളും തലശ്ശേരിയിലെ പെട്രോൾ പമ്പുകളിലേക്ക് പോകുന്ന ഭാരവണ്ടികളും ഉൾപ്പെടെ നൂറുകണക്കിന് വാഹനങ്ങളാണ് കോപ്പാലം വഴി മൂലക്കടവിലേക്ക് പോകുന്നത്. പാനൂരിൽ നിന്ന് തലശ്ശേരിയിലെത്താനുള്ള ഏറ്റവും എളുപ്പമാർഗ്ഗമായതിനാൽ ഈ റോഡിൽ എപ്പോഴും കനത്ത ഗതാഗതത്തിരക്കാണ് അനുഭവപ്പെടാറുള്ളത്.
കുഴികൾ ഉള്ള ഭാഗത്തുനിന്ന് നൂറ് മീറ്റർ മാത്രം അകലെയുള്ള പന്തക്കൽ ഐ.കെ. കുമാരൻ മാസ്റ്റർ ഗവ. ഹയർ സെക്കൻഡറി സ്കൂളിന്റെ പ്രധാന കവാടത്തിന് മുന്നിലും റോഡ് തകർന്ന് ആഴമുള്ള കുഴികൾ രൂപപ്പെട്ടിട്ടുണ്ട്.
കരാറുകാരുടെ വീഴ്ചയും നാട്ടുകാരുടെ അമർഷവും
കോപ്പാലം മുതൽ മാഹി അതിർത്തിയായ മാക്കുനി വരെയുള്ള ഭാഗം ടാർ ചെയ്യുന്നതിനായി മാഹി പൊതുമരാമത്ത് വകുപ്പ് കരാർ നൽകിയിട്ടുണ്ടെന്നാണ് അധികൃതർ വ്യക്തമാക്കുന്നത്. എന്നാൽ പുതുച്ചേരി സ്വദേശികളായ കരാറുകാരുടെ അനാസ്ഥയാണ് നിർമ്മാണം വൈകാൻ കാരണമെന്ന് നാട്ടുകാർ ആരോപിക്കുന്നു.
വേനൽമഴ പെയ്യുമ്പോൾ തന്നെ പുതുച്ചേരിയിൽ നിന്നുള്ള കരാറുകാരും തൊഴിലാളികളും പ്രവൃത്തി പൂർത്തിയാക്കാതെ നാട്ടിലേക്ക് മടങ്ങുന്നു എന്നാണ് നാട്ടുകാർ പറയുന്നത്. മാഹിയിലെ പല റോഡുകളുടെയും കരാർ ഈ സംഘത്തിനാണ്. എന്നാൽ ഇവർ നടത്തുന്നത് നിലവാരം കുറഞ്ഞ പ്രവൃത്തിയാണെന്ന ആക്ഷേപം ശക്തമാണ്.
പന്തക്കൽ മൊട്ടേമ്മൽ ഭാഗത്തെ എൽ.പി. സ്കൂൾ റോഡ് നവീകരിച്ച ഉടൻ തകർന്നിരുന്നു. തുടർന്ന് നാട്ടുകാർ പ്രതിഷേധിച്ചതോടെയാണ് കരാറുകാർ വീണ്ടും ടാറിങ് നടത്തിയത്. പൊതുമരാമത്ത് വകുപ്പ് അടിയന്തരമായി ഇടപെട്ട് തകർന്ന റോഡ് ശാസ്ത്രീയമായി പുനരുദ്ധരിക്കണമെന്നാണ് നാട്ടുകാരുടെയും യാത്രക്കാരുടെയും ആവശ്യം
