മാഹി: ലോക പാലിയേറ്റീവ് ദിനത്തോടനുബന്ധിച്ച് ബ്ലഡ് ഡോണേഴ്സ് കേരള (BDK) കണ്ണൂർ ജില്ലാ കമ്മിറ്റിയുടെ നേതൃത്വത്തിൽ മാഹിയിൽ സ്നേഹ പുതപ്പ് വിതരണം ചെയ്തു. തെരുവിൽ ഒറ്റപ്പെട്ടുപോയവർക്കും, മാഹി ഓൾഡ് ഏജ് ഹോമിലെ അന്തേവാസികൾക്കും, മാഹി ആശുപത്രിയിലെ സർജിക്കൽ വാർഡിൽ ചികിത്സയിൽ കഴിയുന്നവർക്കുമാണ് സ്നേഹ പുതപ്പുകൾ എത്തിച്ചു നൽകിയത്.
പൊതുപ്രവർത്തകനും മാഹി ബാർ അസോസിയേഷൻ പ്രസിഡന്റുമായ അഡ്വ. ടി. അശോക് കുമാർ ചടങ്ങ് ഉദ്ഘാടനം ചെയ്തു. ബി.ഡി.കെ തലശ്ശേരിയുടെ ജീവകാരുണ്യ പ്രവർത്തനങ്ങളെ അദ്ദേഹം പ്രസംഗത്തിൽ പ്രശംസിച്ചു. ബി.ഡി.കെ കണ്ണൂർ ജില്ലാ എക്സിക്യൂട്ടീവ് മെമ്പർ പി.പി. റിയാസ് മാഹി ചടങ്ങിൽ അദ്ധ്യക്ഷത വഹിച്ചു.
എഴുത്തുകാരിയും കേരളാ നദീജല സംരക്ഷണ വേദി വൈസ് ചെയർപേഴ്സനുമായ സി.കെ. രാജലക്ഷ്മി മുഖ്യാതിഥിയായിരുന്നു. കെ.വി. മുനീർ, അഷ്റഫ് എന്നിവർ പ്രവർത്തനങ്ങൾക്ക് നേതൃത്വം നൽകി. ബി.ഡി.കെ എക്സിക്യൂട്ടീവ് മെമ്പർ മജീഷ് തപസ്യ സ്വാഗതവും മുൻ വൈസ് പ്രസിഡന്റ് കാർത്തു വിജയ് നന്ദിയും പറഞ്ഞു.
