മാഹി : മാഹി മേഖലയിലെ ഇന്ത്യൻ ഓയിൽ പെട്രോൾ പമ്പുകളിൽ ഇന്ധനം നിറയ്ക്കുവാൻ വാഹനവുമായി എത്തുന്നവർക്ക് വില കൂടിയ എക്സ് 95 പെട്രോൾ നിർബന്ധിച്ച് അടിപ്പിക്കുന്നതായി ഉപഭോക്താക്കളുടെ പരക്കെ പരാതി.പമ്പുകളിൽ പ്രദർശിപ്പിച്ച സ്റ്റോക്ക് ബോർഡുകളിൽ സാധാരണ പെട്രോൾ (എം എസ് ) സ്റ്റോക്ക് എഴുതി വെച്ച് സാധാരണ പെട്രോൾ ഇല്ലെന്ന് പറയുന്നത് ഇന്ത്യൻ ഓയിൽ പമ്പുകളിൽ നിത്യ സംഭവമായി മാറിയിരിക്കുകയാണെന്നാണ് ഉപഭോക്താക്കളുടെ പരാതി.വിദൂര സ്ഥലങ്ങളിൽ നിന്ന് വാഹനവുമായി ഫുൾ ടാങ്ക് പെട്രോൾ നിറയ്ക്കുവാൻ എത്തുന്നവർ ലിറ്ററിന് 4 രൂപ 50 പൈസ കൂടുതൽ കൊടുത്ത് പ്രീമിയം പെട്രോൾ നിറയ്ക്കേണ്ട ഗതികേടിലായി. കേരളത്തേക്കാൾ മാഹിയിൽ പെട്രോളിന് ലിറ്ററിന് 14 രൂപയുടെ വില വിത്യാസം ഉള്ളതിനാലാണ് പലരും ദീർഘ ദൂരം സഞ്ചരിച്ച് പെട്രോൾ അടിക്കുവാൻ മാഹിയിലെത്തുന്നത്. കേരളത്തിൽ പെട്രോളിന് ലിറ്ററിന് 107.89 രൂപയുള്ളപ്പോൾ മാഹിയിൽ ഇത് 93.80 രൂപയാണ് – പ്രീമിയം പെട്രോളിന് ലിറ്ററിന് വില 98.24 രൂപയാണ്.വിദൂര സ്ഥലങ്ങളിൽ നിന്ന് മാഹി ഇന്ത്യൻ ഓയിൽ പമ്പുകളിൽ എത്തുന്നവർ വഞ്ചിതരാവുകയാണ്. ചില വാഹനങ്ങൾ ഇന്ത്യൻ ഓയിൽ പമ്പിൽ കയറാതെ മറ്റു കമ്പനിക്കാരുടെ പമ്പുകളെയാണ് ആശ്രയിക്കുന്നത്.പമ്പുടമകളോട് വാഹന ഉടമകളോട് പരാതി പ്പെട്ടാൽ വ്യക്തമായ മറുപടിയും കിട്ടുന്നില്ല. സാധാണ പെട്രോൾ ടാങ്കർ ലോറികൾ പമ്പിൽ എത്തണമെങ്കിൽ പ്രീമിയം പെട്രോൾ നിർബന്ധമായും ഡിപ്പോകളിൽ പമ്പുകളിലേക്ക് അയച്ചിരിക്കും. സാധാരണ പെട്രോൾ വില്പനയുടെ 10% പ്രീമിയം പെട്രോൾ നിർബന്ധമായും പമ്പുകളിൽ വില്പന നടത്തിയിരിക്കണമെന്ന് ഡിവിഷണൽ ഓഫീസിൽ നിന്നുള്ള കർശന നിർദ്ദേശമാണെന്ന് സൂചനയുണ്ട്. മാഹിയിലെ ഇന്ത്യൻ ഓയിൽ പമ്പുകളിൽ സാധാരണ പെട്രോളിന് കൃത്രിമ ക്ഷാമം സൃഷ്ടിക്കുന്നതിനാൽ മറ്റു കമ്പനിക്കാരുടെ പെട്രോൾ പമ്പുകളിൽ വൻ തിരക്കാണ് അനുഭവപ്പെടുന്നത്
