ജിതേഷ് വി.പി

പാനൂർ: മുളിയാതോട് ബോംബ് നിർമ്മാണത്തിനിടെ കൊല്ലപ്പെട്ട സിപിഎം പ്രവർത്തകനെയും, പരിക്കേറ്റവരെയും തള്ളിപറഞ്ഞ സിപിഎം സംസ്ഥാന സെക്രട്ടറി എംവി ഗോവിന്ദൻ മാസ്റ്റർ പാനൂരിനടുത്ത് ചെറ്റക്കണ്ടിയിൽ ബോംബ് നിർമ്മാണത്തിനിടെ കൊല്ലപ്പെട്ട സിപിഎം പ്രവർത്തകരുടെ സ്മാരക മന്ദിരം ഉദ്ഘാടനം ചെയ്യാനെത്തുന്നത് പാർട്ടി പ്രവർത്തകർക്കിടയിൽ ചർച്ചയാവുകയാണ്. മുളിയാതോട് ബോംബ് സ്ഫോടനത്തെ തള്ളി പറഞ്ഞ നേതാവ് തന്നെ പാനൂരിനടുത്തെ ചെറ്റക്കണ്ടിയിൽ ബോംബ് പൊട്ടി മരിച്ച പാർട്ടി പ്രവർത്തകരുടെ സ്മരണയ്ക്ക് ഉയർത്തിയ കെട്ടിടം ഉദ്ഘാടനം ചെയ്യാൻ എത്തുന്നത് ഇരട്ടതാപ്പാണെന്ന ആക്ഷേപമാണ് ഉയരുന്നത്.

നവമാധ്യമങ്ങളിൽ പ്രവർത്തകർ നേതാവിൻ്റെ നിലപാടിനെ ചോദ്യം ചെയ്ത് രംഗത്ത് വന്നിട്ടുണ്ട്.22 ന് ആണ് എംവി.ഗോവിന്ദൻ മാസ്റ്റർ എത്തുന്നത്.2015ൽ ആണ് ചെറ്റക്കണ്ടിയിൽ നടന്ന ഉഗ്രസ്ഫോടനത്തിൽ സിപിഎം പ്രവർത്തകരായ ഷൈജു, സുബീഷ് എന്നിവർ മരിക്കുന്നത്. മൂന്ന് പേർക്ക് പരിക്കേൽക്കുകയും ചെയ്തിരുന്നു. സമാനമായ സംഭവം മുളിയാതോട് നടന്നപ്പോൾ നേതൃത്വം കർശനമായ നിലപാട് എടുക്കുകയും ഇപ്പുറം രക്തസാക്ഷി പരിവേഷം നൽകി ആദരിക്കുകയും ചെയ്യുന്നത് അണികൾക്കിടയിൽ വലിയ പ്രതിഷേധത്തിന് കാരണമായിട്ടുണ്ട്.

പാനൂർ: നഗരസഭ പരിധിയിലെ ബൂത്തിനുള്ളിൽ എൽഡിഎഫ് പ്രവർത്തകർ കള്ളവോട്ട് ചെയ്യുമ്പോൾ ബിജെപി ബൂത്ത് ഏജൻ്റുമാർ മൗനവ്രതത്തിലായിരുന്നുവെന്ന് യുഡിഎഫ് ആരോപണം. പൊതുവിൽ കണിശതയോടെ ബൂത്തിനുള്ളിൽ നിലപാടെടുക്കുന്ന ബിജെപി അംഗങ്ങൾ ഇക്കുറി മിണ്ടാതിരുന്നത് എൽഡിഎഫിനെ സഹായിക്കാനാണെന്ന് വിലയിരുത്തലാണ് യുഡിഎഫ് ഉയർത്തുന്നത്. വനിതകളായ ബിജെപി പ്രവർത്തകരെയാണ് ഇക്കുറി ബൂത്തിലിരുത്തിയതും. ഇതാണ് സംശയമുയർത്തിയത്.പാനൂർ യുപി, ഹൈസ്ക്കൂൾ ബൂത്തുകളിലാണ് വിദേശത്തുള്ളവർ അടക്കമുള്ളവരുടെ വോട്ട് ചെയ്തതെന്ന ആരോപണമാണ് യു ഡി എഫ് ഉന്നയിക്കുന്നത്.

ഇന്നലെ കള്ളവോട്ട് തുടക്കം മുതൽ എതിർത്ത മുസ്ലീം ലീഗ് പ്രവർത്തകൻ ടി.മുനീറിനെ സിപിഎം സംഘം മർദ്ധിച്ചിരുന്നു. എൽഡിഎഫ്-യുഡിഎഫ് അംഗങ്ങൾ തമ്മിലുള്ള പ്രശ്നങ്ങളിൽ നിന്ന് ബിജെപി ബൂത്ത് ഏജൻ്റുമാർ ഇടപ്പെടാതിരുന്നത് നേതൃത്വത്തിൻ്റെ തീരുമാനപ്രകാരമാണെന്നും, ബിജെപിയുടെ സഹായത്താലേ മുൻ കാലങ്ങളിൽ പ്രതിരോധം തീർത്ത യുഡിഎഫ് ഇനിയുള്ള കാലം അത് പ്രതീക്ഷിക്കേണ്ടന്നും ബിജെപി നേതൃത്വം പ്രതികരിച്ചു.

പാനൂർ: കള്ളവോട്ട് ചോദ്യം ചെയ്ത ബൂത്ത് ഏജൻ്റും മുസ്ലീം ലീഗ് പ്രവർത്തകനുമായ പാനൂരിലെ ടി.മുനീറിനെയാണ് സിപിഎം പ്രവർത്തകർ മർദ്ധിച്ചത്.പാനൂർ യുപി സ്ക്കൂളിലെ നൂറ്റൊൻപതാം ബൂത്തിലാണ് സംഘർഷമുണ്ടായത്.കള്ളവോട്ട് ചോദ്യം ചെയ്തതിനു പുറമെ ആറു മണിക്കു ശേഷം വോട്ട് ചെയ്യുന്നതു സംബന്ധിച്ചും തർക്കമുണ്ടായി. ബൂത്തിനുള്ളിൽ വെച്ചും, റോഡിൽ നിന്നും കൂട്ടമായി മർദ്ധിച്ചെന്ന് പരിക്കേറ്റ മുനീർ ഓപ്പൺമലയാളം ന്യൂസിനോട് പറഞ്ഞു.സിപിഎം ഏരിയ കമ്മറ്റി അംഗം കിരൺ കരുണാകരൻ, തെക്കെ പാനൂരിലെ വിജേഷ് എന്നിവരുടെ നേതൃത്വത്തിലാണ് സംഘം ചേർന്ന് മർദ്ധിച്ചെന്നാണ് പരാതി.പരിക്കേറ്റ മുനീറിനെ തലശേരി ഇന്ദിരാഗാന്ധി സഹകരണ ആശുപത്രിയിൽ പ്രവേശിപ്പിച്ചു.

പാനൂർ: തിരഞ്ഞെടുപ്പിൽ കൃത്രിമം കാണിക്കാൻ ഷാഫി പറമ്പിൽ എന്ന പേര് ചുരുക്കി ഷാഫി.പി എന്നാക്കി മാറ്റിയെന്ന ആരോപണവുമായി യുഡിഎഫ് രംഗത്ത്. ഇടത് അനുകൂല തിരഞ്ഞെടുപ്പ് ഉദ്യോഗസ്ഥരാണ് പോളിംഗ് സ്റ്റേഷന് പുറത്ത് പേര് ചുരുക്കി എഴുതി തിരഞ്ഞെടുപ്പിൽ കൃത്രിമം നടത്താൻ ശ്രമിക്കുന്നതെന്ന് യുഡിഎഫ് നേതാക്കൾ പറഞ്ഞു.പോളിംഗ് സ്റ്റേഷനുകൾക്ക് പുറത്ത് പതിക്കുന്ന പോസ്റ്ററുകൾ വോട്ടർമാരെ തെറ്റിദ്ധരിപ്പിക്കാൻ ഇട നൽകുന്ന തരത്തിലാണ് ഉള്ളത്. ഇത് ബോധപൂർവ്വമാണെന്നും പോളിംഗ് ഉദ്യോഗസ്ഥരെ കൂട്ടുപിടിച്ചാണ് ഈ കൃത്രിമം കാണിക്കുന്നതെന്നും നേതാക്കൾ പറഞ്ഞു.

പാനൂർ: ഡിവൈഎഫ്ഐ പാനൂർ യൂണിറ്റ് സെക്രട്ടറി എൻവി.ജിഷ്ണു (26) നാണ് മർദ്ധനമേറ്റത്. വള്ളങ്ങാടുള്ള ബന്ധുവീട്ടിലെ കല്യാണത്തിന് പങ്കെടുത്ത് മടങ്ങവേ ആർഎസ്എസ് പ്രവർത്തകനായ കൂറ്റേരി യിലെ റോഷിൻ മർദ്ധിച്ചതായാണ് പരാതി.മർദ്ധനത്തിൽ മുഖത്ത് പരിക്കുണ്ട്. പരിക്കേറ്റ ജിഷ്ണുവിനെ പാനൂർ താലൂക്ക് ആശുപത്രിയിൽ പ്രവേശിപ്പിച്ചു.

പാനൂർ: എൽഡിഎഫ് വടകര പാർലമെന്റ് മണ്ഡലം തിരഞ്ഞെടുപ്പ് പ്രചരണ പരിപാടിക്കായി നാളെ പാനൂരിൽ മുഖ്യമന്ത്രി പിണറായി വിജയൻ എത്തും.വൈകുന്നേരം 5 ന് നടക്കുന്ന പൊതുസമ്മേളനം മുഖ്യമന്ത്രി ഉദ്ഘാടനം ചെയ്യും.ഹൈസ്ക്കൂൾ ഗ്രൗണ്ടിലാണ് പരിപാടി.ഇതിൻ്റെ ഭാഗമായി പാനൂർ നഗരത്തിൽ നാളെ 4 മണി മുതൽ രാത്രി 8 മണി വരെ ഗതാഗത നിയന്ത്രണം ഏർപ്പെടുത്തിയതായി പോലീസ് അറിയിച്ചു.
കോഴിക്കോട് ഭാഗത്തു നിന്നും കൂത്തുപറമ്പ, മട്ടന്നൂർ, ഇരിട്ടി ഭാഗത്തേക്ക് പോകേണ്ട വലിയ വാഹനങ്ങൾ ഉൾപ്പെടെയുള്ളവ കുഞ്ഞിപ്പള്ളി, തലശ്ശേരി കതിരൂർ കൂത്തുപറമ്പ വഴിയും,
കൂത്തുപറമ്പ, മട്ടന്നൂർ, ഇരിട്ടി ഭാഗത്തു നിന്നും കോഴിക്കോട് ഭാഗത്തേക്ക് പോകേണ്ട വലിയ വാഹനങ്ങൾ ഉൾപ്പെടെയുള്ളവ കൂത്തുപറമ്പ കതിരൂർ തലശ്ശേരി വഴി കോഴിക്കോട് ഭാഗത്തേക്കും പോകേണ്ടതാണ്.
നാദാപുരം കല്ലിക്കണ്ടി, കടവത്തൂർ ഭാഗത്തു നിന്നും കൂത്തുപറമ്പ,മട്ടന്നൂർ എയർപോർട്ട് എന്നി ഭാഗത്തേക്ക് പോകേണ്ട വാഹനങ്ങർ പാറാട് കുന്നോത്തുപറമ്പ, ചെറുവാഞ്ചേരി കൂത്തുപറമ്പ വഴിയും തിരിച്ചും പോകേണ്ടതാണ്.
മേക്കുന്ന്, ഭാഗത്ത് നിന്നും കൂത്തുപറമ്പ ഭാഗത്തേക്ക് പോകേണ്ട വാഹനങ്ങൾ ചൊക്ലി പന്ന്യന്നൂർ, താഴെ ചമ്പാട്, കൂരാറ മാക്കൂൽ പീടിക വഴി കൂത്തുപറമ്പ ഭാഗത്തേക്കും തിരിച്ചും പോകേണ്ടതാണ്.
പൂക്കോം ഭാഗത്തുനിന്നും കൂത്തുപറമ്പ ഭാഗത്തേക്ക് പോകേണ്ട വാഹനങ്ങൾ പന്ന്യന്നൂർ, താഴെ ചമ്പാട്, കൂരാറ, മാക്കൂൽ പീടിക വഴി കൂത്തുപറമ്പ ഭാഗത്തേക്കും തിരിച്ചും പോകേണ്ടതാണ്
കോപ്പാലം ഭാഗത്തു നിന്നും കടവത്തൂർ പാറാട് ഭാഗത്തേക്ക് പോകേണ്ട വാഹനങ്ങൾ പന്തക്കൽ പള്ളൂർ ചൊക്ലി മേക്കുന്ന് പെരിങ്ങത്തൂർ വഴിയും തിരിച്ചും പോകേണ്ടതാണ്.
കോപ്പാലം ഭാഗത്തു നിന്നും കൈവേലിക്കൽ പുത്തൂർ ഭാഗത്തേക്ക് പോകേണ്ട വാഹനങ്ങൾ മേലെചമ്പാട് കൂരാറ മാക്കൂൽപീടിക അക്കാനിശ്ശേരി വഴി വഴിയും തിരിച്ചും പോകേണ്ടതാണ്.
കൂത്തുപറമ്പ ഭാഗത്തു നിന്നും കൈവേലിക്കൽ പുത്തൂർ പാറാട് കല്ലിക്കണ്ടി കടവത്തൂർ ഭാഗത്തേക്ക് പോകേണ്ട വാഹനങ്ങൾ മുത്താറി പീടികയിൽ നിന്നും വരപ്ര,നിള്ളങ്ങൽ കൈവേലിക്കൽ വഴിയും പോകേണ്ടതാണ്.

പാനൂർ: ബോംബ് നിർമ്മാണത്തിനിടെ ഒരു സിപിഎം പ്രവർത്തകൻ മരിക്കുകയും മൂന്ന് പേർക്ക് പരിക്കേൽക്കുകയും ചെയ്ത മുളിയാതോട് യൂത്ത് കോൺഗ്രസ് സംസ്ഥാന പ്രസിഡണ്ട് രാഹുൽ മാങ്കൂട്ടത്തിൽ സന്ദർശിക്കും.യൂത്ത് ലീഗ് സംസ്ഥാന ജനറൽ സെക്രട്ടറി പി കെ.ഫിറോസും മറ്റ് നേതാക്കളും കൂടെയുണ്ടാകും. രാവിലെ 10 നാണ് സന്ദർശനം.

പാനൂർ: മുളിയാതോട് ബോംബ് സ്ഫോടനത്തിലെ മുഖ്യപ്രതികളായ 2 സിപിഎം പ്രവർത്തകരെ പിടികൂടി പാനൂർ പോലീസ്.കർണ്ണാടക – തമിഴ്നാട് അതിർത്തിയിലെ കാരക്കോണത്ത് നിന്നാണ് മുഖ്യ പ്രതികളായ കുന്നോത്ത്പറമ്പിലെ അക്ഷയ് (28),കടുങ്ങാം പൊയിലിലെ ഷിജൽ (29) എന്നിവരെ പാനൂർ സ്ക്വാഡ് പൊക്കിയത്. ബോംബ് നിർമ്മാണത്തിൽ നേരിട്ട് പങ്കാളികളാണിവർ.മൊബൈൽ ലോക്കേഷൻ വെച്ചാണ് പ്രതികളെ വലയിലാക്കിയത്.പാനൂർ സിഐ.കെ.പ്രേംസദൻ്റെ നേതൃത്വത്തിലുള്ള സംഘമാണ് ഇരുവരെയും പിടികൂടിയത്.പ്രതികളെ പാനൂർ പോലീസ് സ്റ്റേഷനിൽ എത്തിച്ച്, വിശദമായി ചോദ്യം ചെയ്ത ശേഷം അറസ്റ്റ് രേഖപ്പെടുത്തും. ഇവരെ ചോദ്യം ചെയ്യുന്നതോടെ കൂടുതൽ വിവരങ്ങൾ ലഭ്യമാകുമെന്ന പ്രതീക്ഷയാണ് അന്വേഷണ സംഘത്തിനുള്ളത്.നിലവിൽ 6 പേർ റിമാൻഡിലാണ്. സാരമായി പരിക്കേറ്റ വിനീഷ് ഇപ്പോഴും കോഴിക്കോട് മെഡിക്കൽ കോളേജിൽ തീവ്രപരിചരണ വിഭാഗത്തിൽ ചികിത്സയിലാണ്.സ്ഫോടനത്തിൽ വിനീഷിൻ്റെ ഇരു കൈപ്പത്തിയും തകർന്നിരുന്നു.കൂത്തുപറമ്പ് എസിപി കെ.വി.വേണുഗോപാലിൻ്റെ മേൽനോട്ടത്തിലാണ് ബോബ് സ്ഫോടനം അന്വേഷിക്കുന്നത്.